e-guillotine

Դեղերի զուգահեռ ներմուծման օրենսդրական կարգավորման խնդիրները

2014.07.09
Դեղերի զուգահեռ ներմուծման օրենսդրական կանոնակարգման հարցը քննարկվեց Առողջապահության ազգային ինստիտուտում՝ Առողջապահության նախարարություն, Օրենսդրության կարգավորման ազգային կենտրոնի, Տնտեսական մրցակցության պաշտպանության պետական հանձնաժողովի եւ դեղերի շուկայում գործող մի շարք կազմակերպությունների ներկայացուցիչների մասնակցությամբ:

Օրենսդրության կարգավորման ազգային կենտրոնի փորձագետ Կարեն Ղալթախչյանը ներկայացրեց կարգավորիչ գիլյոտինի մոտեցումը, համաձայն որի տնտեսվարողներին հարկավոր է զերծ պահել ֆինանսական եւ վարչարարական ավելորդ բեռից, իսկ զուգահեռ ներմուծման մանրամասն կանոնակարգումը լրացուցիչ պարտականությունների շարք է ներկրող կազմակերպությունների համար: 

Մասնավորապես, օրենսդրական նորմ է սահմանվել, որով Հայաստանում գրանցված եւ ներկրման ենթակա դեղերը պետք է փորձաքննության ենթարկվեն, հակառակ դեպքում դրանց ներմուծումը կարգելվի: «Այս պահանջը սահմանվել է լիազոր մարմնի իրավական ակտով, այնինչ այս կարգի նորմատիվ իրավահարաբերությունները պետք է կարգավորվեն բացառապես օրենքով: Մյուս կողմից, եթե դեղն արդեն գրանցված է, ինչ իմաստ ունի այն կրկնակի փորձաքննության ենթարկել: Այս կարգավորումը ժամանակի ծախս եւ ֆինանսական լրացուցիչ բեռ է տնտեսվարողների համար», - ասաց Կ. Ղալթախչյանը:

Մասնակիցները համաձայնեցին Կարգավորիչ գիլյոտինի կողմից բարձրացված հիմնախնդիրներին և լուծման իրավական տարբերակներին: Պայմանավորվածություն ձեռք բերվեց առաջիկայում անդրադառնալ բարձրացված խնդիրներին եւ համապատասխան իրավական լուծումներ առաջարկել Առողջապահության նախարարությանը:
Կարծիքներ
Հարգելի այցելուներ, այստեղ կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Գրասենյակն իրավունք է վերապահում ջնջել նշված կանոնները խախտող մեկնաբանությունները: Շնորհակալություն

Մյուս նորությունները